Llywodraethiant

Mae Andrew wedi gweithio mewn amrywiaeth o swyddi ar draws y Sector Cyhoeddus a’r Trydydd Sector yng Nghymru  am y 20 mlynedd ddiwethaf. Bu gyda Pobl ers ei sefydlu yn 2016 ac fel Cyfarwyddwr Gweithredol Gweithrediadau mae’n arwain y Timau Cartrefi a Chymunedau a Gofal a Chymorth. Mae Andrew yn gyfrifol am waith Pobl yn darparu gwasanaethau landlord i dros 17,000 o bobl a chymunedau yn cynnwys tîm mewnol Crefftwyr Pobl. Mae Gweithrediadau Pobl hefyd yn cynnig ystod eang o wasanaethau gofal a chymorth yn amrywio o gefnogaeth tenantiaid hyd at ofal preswyl.

Bu Gwynne yn gweithio ym maes tai cymdeithasol am 33 mlynedd tan fis Gorffennaf 2020. Mae’n falch i fod yn Gadeirydd Gofal a Thrwsio Conwy a Sir Ddinbych a bu ganddo gysylltiadau gyda’r mudiad Gofal a Thrwsio yng Nghymru ers 1996. Mae cael cyfle i fod yn Gynrychiolydd Asiantaeth ar Fwrdd Care & Repair Cymru yn gyfle rhagorol i sicrhau y caiff dull gweithredu strategol sefydliad cenedlaethol a darpariaeth gwasanaethau ar y rheng flaen eu deall a’u datblygu gyda’i gilydd. Mae’n gryf o’r farn fod dull gweithredu sy’n canolbwyntio ar yr unigolyn i alluogi pobl hŷn a phobl gydag anableddau i aros yn eu cartrefi eu hunain yn bwysig i’w llesiant.

Mae hefyd yn ymddiriedolydd elusen elusendai yn Rhuthun.

Ar ôl gweithio i awdurdodau lleol a chymdeithasau tai yng Nghymru a Lloegr, ei swydd ddiwethaf oedd Rheolwr Gyfarwyddwr Cartrefi Conwy lle’r oedd ganddo gyfrifoldeb strategol am wasanaethau tenantiaid ac eiddo. Mae’n Gymrawd o’r Sefydliad Tai Siartredig.

Mae gan Neil 40 mlynedd o brofiad yn y sector preifat a hefyd y sector cyhoeddus. Fel syrfëwr maint siartredig dechreuodd ei yrfa yn y diwydiant adeiladu gan roi cyngor ariannol a chontractiol ar brosiectau mewn amrywiaeth o sectorau. Ar ôl symud i GIG Cymru mae ganddo 30 mlynedd o brofiad fel uwch reolwr, gyda 12 ohonynt ar lefel Bwrdd. Drwy gydol ei yrfa gyda’r GIG bu’n gyfrifol am gynllunio gwasanaeth a chyflenwi prosiectau a rhaglenni ac mae ganddo brofiad helaeth mewn buddsoddiad cymhleth i gefnogi trawsnewid gwasanaeth.

Mae gan Neil achrediad fel Arweinydd Tîm Adolygu ac mae wedi arwain adolygiadau ar weithredu polisïau a rhaglenni/prosiectau ar gyfer Llywodraeth Cymru, Asiantaethau Llywodraeth y Deyrnas Unedig, llywodraeth leol a GIG Cymru.

Rwy’n rheolwr rhaglen profiadol gyda gyrfa yn cwmpasu iechyd, gofal cymdeithasol a’r sector elusennau yng Nghymru. Mae gennyf radd Meistr mewn Astudiaethau Heneiddio o Brifysgol Abertawe.

Rwyf wedi arwain amrywiaeth o gynlluniau i wella bywydau pobl hŷn, yn cynnwys lansio a chyflenwi Strategaeth Dementia gyntaf Gorllewin Cymru. Rwy’n gwasanaethu ar hyn o bryd fel uwch arweinydd polisi yn Llywodraeth Cymru, yn hybu blaenoriaethau cydraddoldeb cenedlaethol ar draws iechyd a gofal cymdeithasol.

Dechreuais fy ngyrfa fel gweithiwr cymorth tai lle gwelais drosof fy hun pa mor hanfodol yw cartref diogel a chyfleus i iechyd, annibyniaeth a llesiant pobl. Mae’r profiad hwnnw yn parhau i lunio fy ymrwymiad i adeiladu cymdeithas sy’n galluogi a grymuso pobl o bob cefndir i fyw yn dda.

Rwy’n frwdfrydig am gyflenwi gwasanaethau cynhwysol a gweithleoedd sy’n galluogi pawb i ffynnu. Rwy’n edrych ymlaen at ymuno â Care & Repair Cymru fel ymddiriedolydd a chyfrannu at ei genhadaeth hanfodol o gefnogi pobl hŷn ledled Cymru.

Dechreuodd fy ngyrfa yn 1981 drwy weithio fel cynorthwyydd cyfreithiol ar gyfer awdurdod lleol yn Llundain. Wedyn symudais i weithio i fy nghymdeithas tai gyntaf, Thames Valley Housing Association, fel eu Swyddog Perchnogaeth Cartrefi yn 1983. Ar ôl 5 mlynedd yn y swydd honno, symudais i Ogledd Cymru ac yma rwyf wedi bod byth ers hynny. Fy swydd gyntaf yno yn 1988 oedd Rheolwr Tai i Gymdeithas Tai Clwyd Alyn cyn symud ymlaen yn 1993 i Gymdeithas Tai Gogledd Cymru fel Cyfarwyddwr Tai ac aros yno am 10 mlynedd.

Rhwng 2004 a 2009 fi oedd Cadeirydd Gwasanaeth Prawf Gogledd Cymru a hefyd yn aelod o Bwyllgor Statudol Cymru ar y Comisiwn Cydraddoldeb a Hawliau Dynol. I barhau fy nghysylltiad gyda tai cymdeithasol, rhwng 2008 a diwedd fy nhymor 9 mlynedd, roeddwn yn aelod o Fwrdd Cymdeithas Tai Cartrefi Conwy ac yn gadeirydd y Pwyllgor Archwilio a Rheoli Risg ynghyd â chyfrifoldebau eraill (tebyg i fod yn Bencampwr Tenantiaid y Bwrdd a hefyd yn Bencampwr Cydraddoldeb y Bwrdd).

Ar ôl gadael y Gwasanaeth Prawf ddiwedd 2009, cefais fy mhenodi yn Brif Weithredwr y Housing Diversity Network, menter gymdeithasol flaenllaw mewn hyfforddiant a mentora yn Lloegr, cyn ymddeol yn 2016.

Rwyf wedi bod yn aelod o Fwrdd Gofal a Thrwsio Conwy a Sir Ddinbych ers 2018 ac yn gadeirydd ers mis Medi 2024.

Mae Fay yn weithiwr tai proffesiynol gyda bron 20 myned o brofiad mewn agweddau niferus o bolisi ac ymarfer tai cymdeithasol, yn cynnwys adfywio asedau, casglu incwm a rheoli tenantiaethau. Mae hefyd yn Aelod Siartredig o’r Sefydliad Tai Siartredig.

Mae ganddi ddiddordeb arbennig mewn tlodi a rôl tai mewn lliniaru effaith tlodi ar fywydau pobl ac mae’n gobeithio y gall ei phrofiad a’i hangerdd gefnogi Care & Repair Cymru i gyflawni ei amcanion ar hyn o bryd ac i’r dyfodol.

Cefais fy ngeni a magu yn ardal Caerdydd. Pan oeddwn yn fy arddegau fi oedd yr unig ofalwr ar gyfer fy nhad-cu a mam-gu oedrannus. Mae gwaith Gofal a Thrwsio yn rhoi cefnogaeth i unigolion a hefyd sicrwydd i’w teuluoedd a gofalwyr. Rwy’n angerddol am waith Gofal a Thrwsio ac wrth fy modd i fedru defnyddio profiad byw yn fy rôl fel Ymddiriedolydd.

Mynychais Brifysgol Abertawe gan astudio’r Gymraeg ac Astudiaethau Busnes ac wedyn TAR mewn Addysg Gynradd. Bûm yn athrawes ysgol gynradd am nifer o flynyddoedd mewn gwahanol fannau yn ne Cymru ac yna’n gweithio i Real Radio a Heart FM ar ymgyrchoedd radio Cymru-gyfan.

Rwyf wedi gweithio fel gwas sifil ers 2018 fel gweithiwr achos ar gyfer adran an-weinidogol. Mae gennyf brofiad diweddar fel aelod bwrdd ac yn edrych ymlaen at ddod yn rhan o dîm Gofal a Thrwsio.

Rwyf yn arbenigydd profiadol mewn cyfathrebu, ar ôl sefydlu a chyd-reoli ymgynghoriath cysylltiadau cyhoeddus yng Nghaerdydd am tua 15 mlynedd, hyd at 2015. Wedi hynny bûm yn gweithio yn y sector ynni, gan ganolbwyntio ar ymgysylltu a dirnadaeth a chefnogi defnyddwyr mewn sefyllfaoedd bregus.

Rwy’n falch i fod yn Ymddiriedolydd i Care & Repair Cymru a gwasanaethau cymorth sy’n helpu pobl hŷn yng Nghymru i barhau’n iach, diogel a chynnes yn eu cartrefi eu hunain.

Cymhwysais fel Nyrs yn 2019 gyda chefndir mewn Iechyd a Gofal Cymdeithasol. Ar hyn o bryd rwy’n gweithio fel Ymarferydd Clinigol Gofal Brys (Gofal Sylfaenol) o fewn arbenigedd Gofal Lliniarol a Phobl Hŷn. Rwy’n gweld drosof fy hun yn gyson yr effaith y gall cartrefi annigonol ei gael ar fywydau pobl hŷn, eu hiechyd ac effaith hynny ar gael eu rhyddhau o ysbyty.
Yn ogystal â fy ngyrfa broffesiynol, rwy’n Rheolwr Gweithrediadau ar gyfer Ambiwlans Sant Ioan, Cymru, prif elusen cymorth cyntaf Cymru, sy’n cefnogi tîm o dros 200 o wirfoddolwyr i gyflwyno gofal iechyd ac ymateb cymunedol fel rhan o strategaeth y sefydliad.
Fel Nyrs sy’n angerddol am ofal iechyd pobl hŷn, rwy’n sicrhau’n barhaus fy mod yn cael yr ymchwil a’r canllawiau diweddaraf yn ymwneud â phobl hŷn ac rwy’n aelod gweithgar o Gymdeithas Geriatreg Prydain.

Gobeithiaf ddod â chyngor a dealltwriaeth o iechyd a gofal cymdeithasol i fwrdd Gofal a Thrwsio, gan gefnogi’r elusen mewn modd strategol i gyflawni ei nodau a’i strategaeth.

Rwy’n byw yng Nghymru a bûm yn astudio Mathemateg, Ymchwil Weithrediadol ac Ystadegau ym Mhrifysgol Caerdydd cyn cymhwyso fel cyfrifydd CIMA. Am fwy na 20 mlynedd rwyf wedi adeiladu gyrfa mewn cyllid, gan ddatblygu arbenigedd mewn gwneud penderfyniadau strategol, arweinyddiaeth ariannol, rheoli risg a chyflenwi newid gan weithio ar draws y sector cyhoeddus a’r sector preifat. Treuliais y degawd diwethaf yn y Gwasanaeth Sifil. Ar hyn o bryd rwy’n Bennaeth Gweithrediadau Ariannol, gan arwain ar gynllunio ariannol, rhagfynegi a rheoli adnoddau ar gyfer maes busnes £40bn.
Rwy’n angerddol am adeiladu perthnasoedd yr ymddiriedir ynddynt, gan gefnogi uwch arweinwyr wrth gyflawni amcanion ariannol a sefydliadol. Ynghyd â fy nghymwysterau proffesiynol, rwyf wedi hyrwyddo cynlluniau cynhwysiant a llesiant, yn cynnwys arwain rhwydwaith cefnogi rhieni i wella arferion dychwelyd i’r gwaith.

Mae cenhadaeth Care & Repair Cymru yn taro tant yn gryf gyda fi. Mae cefnogi pobl hŷn i fyw’n annibynnol, yn ddiogel ac yn urddasol yn eu cartrefi eu hun yn adlewyrchu gwerthoedd gwasanaeth, cydweithio a gofal sy’n bwysig iawn i fi. Rwy’n falch o ddod â fy arbenigedd mewn cyllid ac ymroddiad i wasanaeth cyhoeddus i helpu hybu’r gwaith pwysig hwn.